SHIRIKA LA ELIMU KIBAHA KUANZA KUTUMIA MFUMO WA USIMAMIZI WA FEDHA- EPICOR JULAI- 2015

The News Image


 Kibaha- 4  Februari, 2015

Shirika la Elimu Kibaha linatarajia kuanza kutumia mfumo wa usimamizi wa fedha ( Epicor) ifikapo Julai ,2015. Hayo yamesemwa na Mkurugenzi Mtendaji wa Shirika la Elimu Kibaha Dk. Cyprian Mpemba wakati  akiwasilisha  maada katika  semina ya kujenga uelewa kuhusu mfumo wa epicor kwa menejimenti na wahasibu iliyofanyika jana katika ukumbi wa mikutano wa Shirika.

Aidha Dk. Mpemba amesema kuwa wakati umefika  wa kukubali kubadilika na kufuata taratibu na kanuni zilizowekwa na Serikali. Alibainisha  kuwa mfumo huu utaweka nidhamu katika matumizi na usimamizi wa fedha kwa kuzingatia bajeti iliyopangwa.

Kwa upande wake Mwezeshaji toka TAMISEMI bwana Jeremia Mtawa amesema mfumo huu wa kiuhasibu  utawezesha  taarifa kupatikana kwa haraka zaidi huku ikiongeza uwazi na uwajibikaji. Alifafanua kuwa mfumo huu unaotumia teknolojia ya kisasa utaweza kuratibiwa TAMISEMI kwani kifaa maalum (server) kitawezesha  kumbukumbu zote  kusomeka huko.

Naye Meneja wa Tehama SEK bwana Annen Kimambo aliwasilisha maada kuhusu namna mfumo unavyofanya kazi. Aliishukuru TAMISEMI kwa  msaada wa kifaa maalum cha kuwezesha kutunza kumbukumbu (server) na kutoa leseni itakoyowezesha Shirika la Elimu Kibaha kutumia kifaa hicho kwa ajili ya shughuli  za kiuhasibu.

Mfumo wa Epicor unaotumika nchi nzima kwenye Halmashauri  zote na Taasisi za Serikali kwa ajili ya shughuli za kiuhasibu na usimamizi wa fedha  umeonesha mafanikio makubwa.